Récit de la légende de Tshakapesh par Charles Api Bellefleur
Récit de la légende Tshakapesh en langue innue
Tshakapesh iteu utishkuema; «Ashtam uitsheu nanituapamatau ushkuai.»
Ekue itutetau anite pessish ashtamaut anite menashkuanit. Ekuta e nitautshit kassinu eshinakushit mishtiku kie ushkuai.
Ekuta nenitshishkuatau nenua Katshituashkua, ekue nipeikutau.
Anitshenat innuat, tenishapana utanishuaua, eku ne ishkuess ueniat uikanisha ekue nanituapamat. Ekue uapatak anite ka nipeikunit nenua Katshituashku uikanishuaua.
Muk ushima ekue taniti. Apishissishinua. Eshku anite tenua atamit nenua massimuteutit ukauia. Katshituashku nutimu nenu ishkueua muk anite e taniti nenua auassa apu mitshuat.
Ekue tshiuetiat ne ishkuess ushima anite uitshuat, ekue ana tanite putat. Ekue tutak tshipaikannu, ushkuannu apatshitau.
Natshe, ne uass ekue shenak nenu tshipaikanu. Kie shassikut, shash apu.
Shash metueu, ekue kukuetshimat umisha «Tutu nitatshapi kie nikushkuat» iteu.
Ekue tutamuat e apitshissishiniti utatshapinua.
Ekue unuit, ekue metuet. Ekue pikunat nenua utatshapia.
Kutuka ekue tutuakaniti anu e mishishtiniti, kie tatuau piakunati, eiapit tutuenua utatshapia. Nuasht uin ekue tutamatishut nutimu peiku mishtukua e apatshiat.
Nenua ushima nitautshinua. Tshassikut ekue itenitaminiti. « Ninitautshinan eku apu uikanishiat, apu tat nutauinan kie nikauinan« . Ekuenanituapamat nenua umisha, ekue itat : «Nimish, tshekuan uet eka tatau tshikanishinnuat? Tshekuan muku tshinanu uet taiaku enishiaku? Tshekuannu uet eka tatau tshutauinnu kie tshikauinnu?»
Ekue itukut : «Tanite tshi ut teuat ute, nipaikupanat Katshituashkua.»
Eku nenu iapikunat ushkuannu. Nin au tshimamushitinititi. Ekuat anite tshinakatukuti ne massimuteush, eukuannu nenu muku Katshituashku apu tut mitshit.
-Eshe. Iteu.
Ekue tshitutet, natshi natauu ashit kukuetshimeu umisha : «Tanite etat ne Katshituashku?»
«Eka uin nanituapam» ituku. Anite takutaut teu, nete pessish eshkuamashekanit, ekuta etat.» ituku nenua umisha, «apu tshikut shakuit».
«Eukuan, iteu, nimish tshikushtatshimin».
Pepamutikuet ekue itat nenua umisha : «Nimish tshishiti a Katshituashku nika nipeik?»
«Apu tshissenimak. Uesh umisha itikupan tshe eka nanatuapamat nenua Katshituashkua ekue itat : «Ait nete nika ituten, nimish».
Ekue tshituter, ait nete tetshe ituteu, anite eka taniti nenua Katshituashkua. Nete eshpish eka uapamikut umisha, kau ekue tshiuet, ekue nanituapamat Katshituashku.
Ekue itutet nete takutaut, ekue amitshuet. Eshku apu tut shuku mishishtit. Ekue matitat nenua mashkua. «kuishku nana nete itutenua kie mitshetuat pimutenishapana. Muk aiat kie shakau, kie peikutau itamu ne meshkanu ekue itutet.
Tekushiniti eshkuamishekanit, ekue nikamut;
-Katshituashku,
-Nutaui ka nipeikuat
-kie nikaui.
Eukuannu nenu etutet. Katshituashku ekue petuat, ekue issishuet : «A, A, eukuan ne ka ishkunak tekushinit».
Minuat ekue itat nenua mashkua ka kashteushiniti: «Matshi nanitu-natshishku, uapamishki, tshika nipeienitamu».
Ekue pashakut ne ka kashteushit mashku, ekue naitu-natshikuat Tshakapesha.
Eku ne uin petueu tekushinniti ekue issishuet: «Namieu an».
Ne ka kashteushit mashku ekue shakashkuaik, ekue kukuetshimat :«Tshekuan ua apatshitain?»
Katshituashku ninanituapamau ne ka nipiat tutauia kie nikauia. Namieu tshin ua natshishkatan kie nakutuenimitishui, tshika uapaten ishpish pikutaian! Matshi tshiue» iteu Tshakapesh nenua ka kashteushiniti mashkua.
Minuat uapashk ekue uanuit, ekue nanitu natshishkuat nenua Tshakapesha.
Anitshenat kutakat mashkuat ekue itatau; «Eku tshin uapishku, matshi nanitu-natshishku. Ne ishpish kushtashinakushin, eukuat tshe patshishinit, tshe nipit.»
Tshakapesh petueu nenua uapishkua peshikuniti kie nanituapamikut.
Namieu eshku itenimeu.
Ne uapashku ekue shakashkueik, ekue kukuetshimat : «Tshekuan ua apatshitain?»
«Ninanituapamau Katshituashk ituku, ne ka nipiat nutauia kie nikauia. Matshi tshiue tshitshuat» , iteu Tshakapesh. Ne uapashku ekue tshiuet uitshuat.
Katshituashku ekue kukuetshimat :«Tshekuan tshituk? Peikutau eiapit nituk, iteu ne uapashku. Nui natshishkuau Katshituashku, ne ka nipiat nutauia kie nikauia, eukuan eshit».
«Tshin matashau» iteuat anitshenat muashkuat. «Matshi nanitu-natshishku. Ne ishpish kushtashinakushin, eukuat tshe patshishinit, tshe nipit.»
Matashu ekue pashikut kie Tshakapesh petueu tekushinniti ekue issishuet: «Namieu ne ua uapamak.»
«Matshi tshiue, iteu Tshakapesh « Katshituashku nui uapamau, eukuan ka nipiat nutauia kie nikauia, eukuan ua natshishkuku.
Tshakapesh ekue itat nenua mashkua:«Nakatuenimitishu, tshika uapaten eshpish pikutaian.»
Ue mitishu tshauet anite uitshuat, ekue issishuet: «Peikutau eiapit nituk miam nenua kutaka ka itat.»
Katshituashku ekue issishuet. «Tshika patshishinnu, tshe nipit umennu uapamiti!»
Tshakapesh pituat katshituashkua tekushiniti, ekue issishuet: «Etshe tekushinnit, ekue nitakushipatat, ekue natat utatshapi kie ukashkua. « Ekute ume pinishu ekuat tshe uepinit ashit nenu ussun tshi minamit« , itenimeu Tshakapesh.
Katshituashku ekue shakashkuaik.
Tshakapeh anite pimishinu anite umeshkanaminit nenua Katshituashkua. Miam nepit eukuan eshinakushit. «A ua ne, ka ui natshishkuat Katshituashkua» issishueu Katshituashku, kie itenimeu: « Petut takushinuki, eukuat tshe patshishinit tshe nipit.
Ekue tatatishkuat nenua Tshakapesha. « Tshima uepashkut ashit nenu ussun, itenimeu nete panashu» itenimeu Tshakapesh».
Katshituashku ekue uepinat nete pessish etaniti nenua utatshapinua, ekue nashuat nenua Tshakapesha minuat eukuan etenitak : « Minuat anu pessish nika uepinuk« itenimeu.
Eku ne Katshituashku minuat ekue utamuat.
Tshakapesh kukuanitshiniku anite sheku ushpitunit, ekue papit. Minuat Katshituashku ekue uepinat nete miam etaniti utatshapinua, ekue pashakushipatat ne Tshakapesh tshekat ushimuku nenua Katshituashkua ekue utshipatat utatshapima.
Katshituashku ekue kukuetshimat:« Tshekuan ua apashtain?`
«Ninanituapamau Katshituashku. Ne ka nipiat nutauia kie nikauia. Eukuan ua natshishkuk.» iteu Tshakapesh.
«Apu nita tshikut nipeit, mishkushiu tshetshi nipiakanit», iteu ne Katshituasku.
«Miam ne mineik ka tshimishua, eukuan ishpish mishkushit. Tshutaui nipeikupan Katshituashku… Tshitapan ne mineik.» iteu ne Katshituashku.
Ekue itukut :«Mishkushiu miam neme ashtamishet, tshitapam mate.
Tshakapesh ekue pimutukuatak anite ashtamishet nutimu ekue nishipannit.
Katshituashku eukuannu ueshimat nenua Tshakapesha ashit nikamu nianituapamat ukashkua. Apu tshissenitakushit muk tan ituetshe, kie nimushum apu tshissenimat.
Minuat ekue unikaput Tshakapesh, ekue pimutukuatat Katshituashku anite ushukunnit.
Ekue patshishinnit anite upime.
«Shash kueshte ni tshi tutuau nutaui ka nipeikut Katshituashku»,issishueu Tshakapesh.
«Eukuan tshi nikatshin» iteu Katshituashku.
«Tanite uet tshi issishuein tshinikatshin?», ekue itat ne Tshakapesh.
«Tshin an ka nikatshiin, ka nipeit nutaui. Nimish nimishkakuti. Tshin an ka nikatshiin.»
«Tiet nipei» iteu ne Katshituashku.
Katshi nenu tshish-aimitutau, Tshakapesh ekue nipiat Katshituashku.
Ekue matishuat, naikuat, pakunat, ekue nananituapatamuat utauia ushkanua kie ukauia. Muk apu mishkamuat. Mishkuamuatakue ushkannua nenua utauia kie ukauia, tshipa tshi tutuepan kau tshetshi inniuniti uikanisha. Muku upishkueunnua ut mishkamueu.
Ekue uepinamuat nenu utauia upishkueunua anite mishtikut.
«Eukuan ne anutshish ka tshikamueini mishtikut tshekuan» issishueu.
Aimitishu ekue ititishut : «Tshekuan nipa tshiuetan nitshinat? Ushtikuan nenu mashku, eukuan tshe tshiuetaian! Eku nimish? Uiash-amishkunu nika tshiuetuau uin tshe apashtat, issishueu.» Eukuannu eshi tshiuetat!
Tiekushinit nete, ekue itat umisha:«Shash kueshte nitshi tutuau nutaui kie nukaui ka nipeikut Katshituashku.
«Tshi nanituapamati a ne?» ituku umisha.
«Tapue ninatituapamati» iteu. «Matahi shatshuapat ne ushtikuan-mashku, tshe tshissimin. Eukuan ne tshin ne uin. Tshe tshissimin ne uiash, tshe mitshimin. Nin kau nika tshituten, nika nanit-anakutshashuten» iteu.
Tshakapesh muk anakutshasha ishi-natauuipan.
Katshi tshituten, anite etat, ekue petuat mianiti umisha.
« Tshekuanitshe uet mat« itenimeu. Enitshe nenu ushtikuan-mashku…« Iteshipan nenua umisha tshe eka mitshiniti.
Eku ne uin nenu tshassik ushtikuannnu menikatenit, ekue pakuepatak ekue mtshit apishish.
Ekue utshipitakut utapassikan, apu tshi shenak utun.
Tshakapesh ekue tshiuet tekushinit nete :«Tan eitin? Iteu.
Ekue utinak mishtikunu eukuannu sheashkuaimuat utunnu.
«Muk nishtumitshitin tshika tshi shepanu» iteu. Kie inniutau minuat innuat , eukuan tshe ishpish shepannit nishtumitshitin utunnuaua.
Ekue tshi shenamuat umisha utunnu.
Ekue itat: «Eukuan ishpish mitshishu, ne uiash mitshi.»
Katshi mitshit nenu ushtikuanu, minuat ekue tshitutet, ekue itat umisha: «Nitshituten ninanitu-anakutshashuten».
Minuat Tshakapesh ekue itat umisha: «Nimish, nipuamiti, tshitishinatan ka nunikua. Nakashku anite ka pakushtuepanua, ekue nituapamak, eku ne katshemeshukunieut ekue akumit.»
Tshakapesh peikuau ekue unuitiat utatshapi, kau ekue eka takushinit.
Umisha ekue itenimikut:« Enitshe ka ishit.«
Ekue tshitutet ekue nanituapamat nenua ushima.
Mukuutatshapinua ut mishkueu, ekue mat.
Katshi tshishi mat, eku piashteniti ussishikua, ekue tutak kashkannu ekue kusset.
Umisha katshi paskushtuaiminiti ukushkanu, Tshakapesh ekue itat nenua matimekua :«Matshi nataimu nenu nimish ukashkan».
Ushkat nenua nepianiti umisha namesha, mishta-mishanu ushkatanua (ventre). Minuat mitshet ekue nipianiti.
Katshi tshishi kusseniti, ekue naikuat ne ishkuess nenua namesha.
Ushkat umuennu shienat ka makunat, nenua ka mishaniti ushkatanua.
Tshakapesh ekuat uet iniut, ashit issishueu : «Ei nimish, tshekat tshimatishaun!»
Minuat, Tshakapesh ekue tshitutiat utatshapia, nanitu-anakutshashueteu.
Anite etat, ekue petuat auennu mishkamia pakuneuennua.
«Nimish tshissenimetshe» iteu. Nika tshiuen pitama tshe uauitamiku. Ekue tshiuet uitshuat, ekue itat umisha: «Nipetuauat auenitshenat pakuneuatau mishkamia.»
«Eka uin naniituapamat iteu nenua ushima. Amishkua nanituapameuat kamishishtiniti. Eku auennua uetitikutau, shitshimeuat tshetshi utinaniti nenua amishkua. Eku ne uin ekue pakushtuepatikut nenua ka mishishtinit amishkua» iteu nenua ushima.
«Anitshenat ka mishishtiniti amishkuat pakushtuepateuat auennua ekue uaushinuatau».
«Eukuan nimish, tshikushtatshimin, ait nete nika ituten. Apu tshikut nanituapamakau.»
Ekue tshitutet, ait nete ekue itutet. Ashit issishueu :«Apu tspuetuk» nenu ishit nimish, nika shatshuapamauat. Ekue nituapamat. Ekue takushinit nete shakaikanit shit shipassiteu utatshia. «Maniteu tskushinu», issishuanu. Minatau tshetshi utshipatat amishkua, tshe uaushinuauku pakushtuepatikut», issishueuat uinuau anite aimituat.
Tekushiniti Tshakapesh, ekue pimutikuet, mishta uatshipanua nenua ukashkua.
«Utshipish ne amishku», iteuat. «Tshika uaushinuakanu pakushtuepatikut.» Uinnuau anite itutuat.
Ekue ueueshtauatau anite ut, utshipatanit nenua amishkua.
«Maniteu issishueuat». Apu nit uapatak umuennu aitinanunit. Tshika utshipatau ne amishku.
«Shash a tshi uapaten ne?» iteuat.
«Mauat nin» iteu.
«Tshitapaminan, tshe tutamat, iteuat, eukuan ne kie tshin tshe aitin».
Tshakapesh ekue tshitapamat. Anite ut utshipitenua ushpishkunit, ekue unauitashinanit anite nipi. Nishukuenua nenu uenitashinaniti.
«Eukuan umue tshe tutamin», iteuat.
«Eukuan miam» iu Tshakapesh, «muk peikuau nika tuten».
«Anite api»,, iteuat. Katshi ueuetinatau anite tshe apinit.
Tshakapesh ekue itshenat anite apishish tshe apit. Ekue aitit miam uieueshtat anite tshe apit.
Passe anitshenat issishuauat innuat. «Apu uesha shuku kie eka innishit!»
Katshi tshishi-ueueshtat. «Eukuan miam, eku», iteu Tshakapesh.
Ekue tshishtaikanit nenu uishtinnu, ekue uauuipannit amishkua. Tshakapesh ekue utshipatat napatetiniss, ekue uepinat anite kunit, ekue utamuat. Peiku ne napeu ekue issishuet : «Apu shuku animiut tshetshi utinat.»
Kasthi nipiat nenua mashkua, Tshakapesh ekue makupitat, « eukuannu tshe tshiuetishimuat« , itenimeu ne peiku.
Ekue nakanat ashit iteu : «Eka pitama tshiue, ashuapata uenapissish, tshika uapaten tshe tutakuin manituanut! Apu tut minikuin ne amishku.»
«Tshe nanituenimekuat anitshenat, tshinuau kanauenimekuat ka nipeikau, anitshenat. Tshinuau eshinakuanit tshetshi kashtinekuat», iteu Tshakapesh nenua ka ui nakanikuat tshetshi tshitutet.
Ekue makunat nenua napeua, ekue pimipatamuat ushpitunua.
Anitshenat kutakat ekue issishuetau : «Eka nutshiatau. Uinnitshe Tshakapesh. Apu animiut ka ui aitit. Uinnitshe».
Tshakapesh ekue tshiuetiat umishkua anite uitshit. Tekushinit, ekue itat umisha: «Nimish, amishku nipeshuau!»
«Tshitutetakapan nete», ituku umisha.
«Eshe nituteti, tshe ishpish eka taian, tshissu ne amishku» ituku.
Uenuit, Tshakapesh petueu auennua kashkuashkuaniti aitikuianna. Ekue itutet nete ka petak , ekue issishuet: « Nimish nishtuapametshe, nika natshi-uitamuau« .
Ekue tshiuet uitshuat, ekue itat umisha: «Nimish, nipetuauat nete auenitshenat.»
«Atshenishkueu an, Mishtapeu utishkuema. Nishinnua utanisha, eka uin itute. Ne ukaumau nipieu auennua. Uiapamati nipieu,» iteu ne ishkuess.
«Eukuan nimish, tshikushtatshimin!» Uapatinieu nenua umisha nenu uapineu upiuinua, tshetutat: «Ait nete nika ituten», iteu nenua umisha.
Eukuan aitit, muku katshi kutauashkuaik, ekue issishuet : « Apu tapuetuk nenu etatshimut, nika ashatshuapamau.»
Ekue tshitutet nianituapamat, aiat pessish teu. Eku anitshenat ishkuessat ka kashkashkuatau nenua atikuiana ekue papitau. Tshakapesh aiat petashtamuteu kie tapishkatsheu nenu upiui, uapineua upiuinua. Eku ne ukaumau anite pitakumit ka tat patshuianitshuapit, ekue petuat piapaniti utanisha. Ekue aitapit anite unuitamit, ekue uapamat unatshima.
«Tshekuan ueshinameku, nitanishitiku?. Tshushinuauau a ne napeu?»
«Mauat, uishkatshan an» iteuat anitshenat ishkuessit. Tshitshipatuau nenua upiui-atikua anite nueuepanimuanan nanikutini.»
«Mauat, namieu, itukut nenu ukauiuau. Napeu an, tshikamueipan nenu uapineua upiuinua anite ushkassakinit».
Eku anitshenat ishkuessit ekue itatau nenua Tshakapesha tshetshi akua tutuakaniti ukauiuaua.
«Tshika ui ashimiku innu-piminnu, eka uin mitshi ne pimi uishauau. Ninan tshika ashamitinan pimi kie tshika tshi mitshin.»
Ekue pitakaiat nenua ukauiuaua unatshiminua. Ekue ushtashkupishtuatau nenua ukauiuaua e nishtitau. Tshakapesh anite tashtuit utapu ekue ashamakanit. Atshenishkueu ekue tshimishak nenu piminnu ka uishauanit ekue utinamuat.
Tshakapesh asit iteu : «Umue nitanishituku ui mitshiti umennu…
Anitshenat ishkuessit ekue itatau nenu Tshakapesh : «Eukuan innu-pimi, eka uin mitshi». Shash nanun ne pimi.
«Anitshenat nitanishat issishueau niteieshkushin ishpish kanauenimikau, utin».
Muku apu auennua utiminiti upimimu.
«Tshika mashikatunanun», iu ne ukaumau. «Tshika uapamau tan eshpishit!»
«Eka uin nipei! iteuat anitshenat ishkuessat, ni ui uitshimanan».
«Apu tshikut nipeik, muk tshiam nui mashikuau», issishueu.
Ekue tshikamutat nenu umashitsheu-akup, ekue uishamat nenua Tshakapesha, ekue natshipatat nenua utanisha. Tshakapesh ekue itat nenua ishkuessa tshetshi ushte ititeniti tshetshi eka nutshikuat.
«Peikuau muk mika mashitshen», issishueu ne Tshakapesh.
«Eka uin nipei», iteuat anitshenat ishkuessat nenua ukauiuaua.
«Apu tshikut nipeik». Ekue mashikatutau ashit Tshakapesha, nasht apu manatshipatat.
«Nitanishituku, apu shuku uinnut. Nananat kutakat anu uinnipanat!»
Ekue muneik nenu neikanu, ekuat takunnit ashininnu eshku umikunnu.
«Eka nipei», iteuat anitshenat ishkuessat. Tanite ekuat anite ashinit nanitamu nipiepan nenua kutaka innua. Apu tshikut nipeiku» iteu.
Minuat ekue utshipatat nenua unatshima, eukuannu nasht apu shatkutshipatat.
«Nitanishitiku, uinu», issishueu.
Tshakapesh usht ui tutam miam meshta-kushikutit. Minuat ekue kutshipanitat tshetshi itshipatat, apu tshi tutuat.
«Peikuau nika mashitshen», issishueu Tshakapesh.Ekue itat nenua ishkuessa: «Tan tshe tutuk ume tshikauiuau? Tshika mitatauau a nipeiki? Mitateku, apu tshikut nipeik iteu. Muku, eka mitateku, nika nipiau.»
«Nika mishta-minuenitenan», ituku nenua ishkuessa.
Ekue utshipatakau ishkuasseua ekue ututamakateuaht nenua ukauiuaua.
«Patshitini iteu nenua Tshakapesha. Tshishuapuat».
«Mauat, eka patshitin, issishueuat anitshenat ishkuessat, nika nipeikunan».
«Itsheteku anite» itukut Tshakapesha. Ekue utshipatat, ekue upapatat ekue anat anite ashininu tekuannit ekue nipiat.
«Ashtam nitshinat itutetau» iteu nenua ishkuessa. Nimish peikussu kiashikanit tshe uitapameku.
Tekushinnit nete uitshuat, ekue itat umisha:«Nimish, ni peshuauat nish ishkueuat, eukuan tshe ishpish mueshtatamin, tshika teuat tshuitsheuakanat.
«Tshi nipeimatakupana ukauiuaua», iteu.
«Uinuau nishitshimukutit tshetshi nipeimiki», iteu.
«Tshekuan ne uet tutamin» iteu.
«Uinuau nitukutit tshetshi aituk». Eukuan tshe uitsheuakanin, iteu.
Tshakapesh ekue uitshimat nenua peiku ishkuessa.
Minuat ekue unuit ahit issishueu : «Nika nanitu-anakutshashueten. Uitapameku ne nimish».
Anite nenu etat, petueu auennua teuueniti. « Nimish nishtuapametshe, nika natshi-uitamuau« , itenitamu. Ekue tshiuet.
«Nimish, ni petuauat nete auenitshenat. Tuueuat.»
«Eka uin nanatuapamat ituku umisha. Ushtukuan-muashkunu metuatsheuat. Eukuan Mishtapeu. Eku auennua nenituapamukuht, pimushinataueuat nenu ushtukuan-muashkunu ekue makumukut auen.»
«Nimish tshi kushtatshimin, iteu Tshakapesh. Ait nete nika ituten. Tshitapami mate tshe ishi-tshituteian».
Tapue anite ait ishi-tshituteu katshi kutauiashkuaik, ekue issishuet: «Apu tapuetuk nenu essishuet nimish, nika ashatshuapaten.»
Ekue itutet nete etaniti nenua innua. Mishta minuashinu anite etaniti mushuanu, tuuanu. Uapameu Tshakapesha meshta-pukutaniti. «mishta-utshepinua emakunaminiti nenua ushtukuannu at shuk mishta-kataku uiepinaminiti kau ekue uepinaminua kie ushepinua. Mishta-pukutauat itenimeu Tshakapesh. Nipa minueniten tshetshi makunak, nimish tshipa tshi uitshimeu. Tshima uepinamuht ushtukuannu anite etaian, itenitam.
Kie eukuan eshpannit, uepinamaku nenua ushtukuannu anite etat ne Tshakapesh eku ne auen ua makunak ekue nituapamat, ekue makunat ne Tshakapesh : «Nitshinat itutetau, tshika uitshimau nimish, nanitam peikussu».
Ui nanakaueuat nenua Tshakapesha tshetshi tshiuetiakaniti kie iteuat : «Eka nutshi ne.»
«Napeuat an tshinuau iteu ne Tshakapesh, tshika tshi iat shaputue tuuenauau. Ishkueat a tshitenimitishunauau?»
Tshakapesh ekue utshipatat ekue pimipatamuat ushpitunnu, eka nenu tutuat atut tshi tshiuetieu uitshuat. Mishta-aiashikueu ne napeu.
«Eka nutshieku, Tshakapesh etshe. Nasht apu animut nenua ka ui aitit», iuat anitshenat innuat.
Tshakapesh ekue tshitutet tshiuetieu nenua. «Ashtam nitshinat itutetau iteu nenua
innua. Tshika uitshimau nimish peikussu.»
Tekushinit uitshuat, Tshakapesh ekue issishuet : «Nimish, napeu ni peshuau tshe uitshimit tshin nanitam muieshtatamin.»
«Tshi nituapamatakupan anitshenat innuat», iteu ne ishkuess.
«Eshe ni nituapamatit» iteu ne Tshakapesh. Anutshish tshika tshi uitshimau ne napeu. Nin nanitam ka peikuteshian ka nanitu-anakutshashueteian, tshika teu auen tshe uitsheuku», issishueu.
Iat mamu nanitam ekue tatau minekash muku tshiam nanitu-anakutshashuueteu mani.
Tshakapesh nanitu-anakutshashueteu ashit enua uishtau shassikut ekue petuatau auennua uieuepashiniti. «Auenitshenat pishk ma issishueu. Eka uin anite itutetau, iteu uishatau. Ashtam patima natshi uitamuatau nimish, uin tshissenimetshe nenua auennua».
Ekue tshiueht uitshuat.
«Nimish», iteu ne Tshakapesh «ni petuanan auenitshenat uieuepashitau…?»
«Eka uin itute ituku umisha. Anitshenat innuat ueuepashuat anite ashinit anite pessish kassekat. Eku anite utapakatenu nenua apishanapinua aitu anite ashinit. Anite enat ne tekuat paushtuku tshishtuit. Ekute eshtet assiku uteuapui nasht shakassinepeu. Eku ne auen nenu uieuepashiti, ekue passishuaht. Ne auen ekue patshishinit anite assikut».
«Eukuan, nimish, tshi kushtatshamin. Eukuan ishpish uauitamu ne tipatshimun! Apu tshikut ituteiat, ait anite nika itutenan. Tshitapaminan mate tshituteiati.
Tapue ait nete ishi-tshituteuat. Tshakapesh tshitutau piminu mak upiuishipa upineu upiuinua kie katueu nenua umisha. Eukuannu nenu kiatat.
«Ashtam nituapamatau, ashtam natshi shatshuapamatau tshekuannu e tutakau», iteu nenu uishtau. Ekue tshitutetau, ekue nanituapamatau nenua innua. Pessish etaht, Tshakapesh ekue itat : Shash pessish tshi tananu, tshika uishamukunuat tshetshi ueuepashuak. Tshin eka uin itute, nin nika ituten. Tshe nakatuenimin tshe ishpish ueuepashian. Tshi passishikau nenua apishanapinua, anite nika patshishin assikut. Muku tshiam tshika nakatuapamauat anitshenatupiuiship. Eku nipi, uteti, kie uauieshinateti, eukuat tshe uapamitau anitshenat tshe akutshinnit upiuiship. Eukuan tshe sheniman ni massamuteush ne pimi ka kanauenitaman tshe ussitapatshipan. Tshe itatyau anitshenat innuat tshetshi uashkapishtakau nenua assikunu tshe ishpish ueuepashian. Eku uapatamini ne upiuia anite ussitapet tshe itatau shash tshekat tshika nukuan pimi».
Tshakapesh katshi kassinu uauitamuat nenu tshe aitiniti uishtau, ekue itutetau anite enishitau anite etaniiti nenua pessish.
«Maniteuat!» issishueuat anitshenat innuat. Ashtam ueuepashuk!»
«Tanite nipa tshi ueuepashinan, iteu Tshakapesh, apu nita uapamitshit nenu auen aitit!»
«Eukuan umue tshe tutameku tshitapaminan», issishueu ne peiku.
Peiku ne ekue ueuepashit anite nenu tshishtuit paushtukunu anite ut nitshipataku nenua kutak napeua papeik. «Tshi uapatenau a tshe tutameku? Iteuat anitshenat innuat.
«Eshe nin nika ituten, peikuau muk nika ituten», iteu Tshakapesh.
Ekue ueuetapit ekue ueuepashit. Nenu eshpish natshipatanait anite ueuepashuan, muku aiat tshishipanu. Eukuannu pessishuakanit, Tshakapesh ekue putishuepanit anite assikut anite tshishtuit ka-ishtenit nenu shipit. Eku anitshenat innuat ekue nituapatakau nenu assikunu eukuannu nenua uishtaua Tshakapesh tshatamanit tshetshi ussitapekutshinnit nenu upiuishipa. Shassikut ekue ussitapekutshinnit.
«Apuku anite pessish assikut iteu, shash tshekat tshika nukuan pimi tshe mamushitinameku».
Pessish ekue itutetau anite assikut. Ekue uashkapishtakau. Eukuannu Tshakapesh shienak upimim. Shash ekue apatenit… Ekue pishikut ekue kuetipatak nenu assikunu, kassinu kuetipatam nenu piminu anite uashka. Ekue kushit anite takutaut, ishpanitaukashinu nenu anite tekuannit. Ekue minipatak upiuia anite ushkassikan, kassinu anite ueuepinam muku upishkuana ut kanauenitam, umamana, umamamissa.
«Minuat innuat inniutau, issishueu muku tshika upishkunnuat. Eukuan tshe ishinakushitau».
Ueshkat nutam minaushikapanat innuat.
«Ashtam tshiuetau», iteu Tshakapesh nenua uishtaua. Shikatshu apu upiuauat.
Ekue takushinitau uitshuat Tshakapesh ekue itat umisha: «Nuteuapukutaukutan. Ni natshi ueuepashitan».
«Tshekuan anite uet ituteiek?» iteu ne umishimau.
«Ni shatshuapamatanan ekue ishimat tshetshi ueuepashutshit. Nin ekue ituteian ekue passishakau pishanapinu, eekue putshishuepanian anite assikut», itatshamu ne Tshakapesh. Nasht mushushiu, ekuat anite muku ushtikuanit uepiuauat. Nenu upishkuana, umamama mak umamamissa. Ekue tutakannit umatshunishima ekue tshitutet ekue natshi natuut.
«Eka uitsheui, iteu Tshakapesh nenu uishtau. Nika peikuteshin.»
Ekue tshitutet nanitu-anakutshashueu. Shassikut, katshi pimutukuatat anakutshasha anite mineikut ekue matshimushimat ukashkua anite mishtikut. Ekue kushit nituapamau. Uetitanat, ekue putatat nenua mineika. Kie petueu nenua anakutshasha kueshipataniti. Shassikut, apu tshekuannu petak, «Tan ishinakuannutshe anite ishpimit itenitam», ekue kushit. Uetitat nenua anakutshasha, minuat ekue putatat nenu mineika. Kie ne anukutshah kuishkushiu kueshipatat petueu Tshakapesha… Shassikut ekue eka petuat. «Tan ishinakuannutshe anite anu ishpimit», itenitam ne Tshakapesh minuat.
Minuat ekue kushit, uetitat nenua anakutshasha, minuat ekue putatat nenua anakutshasha kie nenu mishtiku mineikua. Nakutshashk ekue kushipatat eiapit kie Tshakapesh petueu nenua tetueiashkupitanit. Shassikut ekue eka petak tshekuannu.
«Tan ishinakuannutshe anite ishpimit», itenitam.
Shassikut, ekue tskushinit nete takuannu anite assinu. Ekue pamutet. Ekue uatat auennua pamuteshipan ute auen itenitam. Miam anukutshash eukuan eshinitukushit kassinu anite eishpatau. Kassinu anite papamipaitinanunishipani. Tshakapesh kassinu anite eituteu kie kassinu anite uapatam anite pemutannukueni kie nuasht anite ka pimutet pimutanunishipan.
«Tshekuantshe, itenitam. Ekue kutat unakuana, ekue tshitutet anite nenu ka pimutanun. Mekuat mak e pimutet, shassikut ekue kashtashpishkat. Tshekuatshe itenitam? Etshe ninakuan», itenitam. Ekue tshiuepatat ekue shatshuapatak unakuan, ekue uapamat pishum miamashitsheniti. Ekue uepinat nenua anakutshasha tshetshi pashkataminit nakuaniapinu. Muku ne anakutshash ekue ishkuashut. Minuat ekue itashuat apukushisha tshetshi pashkataminit nenu apishanapinu… Eukuannu mashten uiepanat, ne anakutshash anite tshetshe tshiuetin ka tat eukuan ka tshi pashkatak nenua nakuanipinua. Kau ekue tshishikat.
«Tshekat ni nipitan assi, itenitam ne Tshakapesh. Ekue nitapukushit, ekue tshiuet anite uitshuat.
«Eukuat anite tshe taiat, mishta mitshetu anakutshash, itenitam. Ekue shaputuetet. Tiekushinit uitshuat ekue itat nenua umisha: «Nimish ni mishken nete assi. Eukaut tshe taiak.»
Minuat uiapannit eukuat etutet. Tekushiniht anite mineikut, Tshakapesh ekue itat: « Mishta-mitshetu anakutshash anite». Ushkat uishtau kushinua minuat Tshakapesh utishkuema, mashten umisha eku minuat uin anite utat.
«Anite utat nika ututen iteu patshishinieki tshishkuepanieki ute tshika ut makunitinauau».
Shashkuepannit, patshishinu Tshakapesh anite ut naushuneu, kassinu ekue tshi takushinitau. Tshakapesh ekue issishuet: «Apu tshissenimak tan tshe tutuk ne mishtuku. Anitshenat minuat innuat inniuht papamuteht ute pessish tshika uapameuat mishtikua kie tshika ui kushiuat. Nika putatau kau tshetshi ishpashtit miam ka ishpashtit».
Ekue putatat nenua mineika kau ekue apishissishiniti miam ueshkat ka ishinakushiniti.
Tshakapesh ekue itat nenua kutaka: « Matshik itutek nete ka ui ituteiek, anite tatipan. Nin eukuat ute tshe taian pishimut».
Nenu uishatu nete ekue anat uapanitshekatakut. Eukuat anite anat. «Eukuat ute tshe tain iteu. Eku nenu umisha kie utishkuema apu tshissenitakushiniti nana nette etaniti, apu tshissenamat auen.
Eukuan eshkuapekat tipatshimun.